Astelehenetan irakasle laguntzaile bat etortzen da gelara ordu t'erdiz. Gelako haurrak hiru taldetan banatzen dira, eta txandakatu egiten dira bi talde txiki gelan dauden bitartean hirugarrena irakasle laguntzailearekin joateko. Azken bi astelehenetan nik gelako taldeetako bat hartu dut eta partxisean jolasean jarri ditut haurrak, bi dado erabilita.
Biharko, pentsatu dut tutoreari proposatuko diodala ontziak hondoratzeko jolasean aritzea. Horrela, aritmetikaz gain, haurrek erreferentzia sistema kartesiarra eta ezaugarri topologikoak landuko dituzte. Izan ere, eguraldiaren jarraipena egiteko taula bat erabiltzen dugu gelan, eta iruditu zait haurretako askok ez dutela taula ulertzen.
Ezer prestatu aurretik, Interneten material bila ibili naiz, bereziki bost urteko gelan egokien izango den zutabe eta errenkaden kopurua zehazteko ereduak ikusi nahi nituelako. Bilaketan zehar hainbat webgune interesgarri topatu ditut, hala nola, matematikaren didaktikari buruzko "Aprendiendo matemáticas" bloga, jarduera eta material mordoa dituena. Bertan aurkitu dut ontzien jolaserako ideia interesgarria, momentu honetan praktikan jartzeko konplikatuegia iruditzen zaidan arren. Blog honen antolaketa gure matematikaren didaktikako irakasleak bidali zigun beste baten antzekoa da, "Math at play", ingelesez eta gaztelaniaz dagoena. Bietan bereziki deigarria da Haur Hezkuntzako lehen ziklorako proposamenak aurki daitezkeela, eta hori ez da batere ohikoa.
Ontziak hondoratzeko jolas komertzialak ere begiratu ditut, 5 urte inguruko haurrei zuzendutakoak, eta horietako batean ikusi ahal izan dut bi eredu zituela: hastapenekoa (5 zutabe eta 5 lerrorekin) eta aurreratua (8 zutabe eta 8 lerrotakoa). Ikusi ditudan beste adibide gehienetan 10 x 10ko erretikula erabili dute, Haur Hezkuntzarako gehiegizkoa iruditu zaidana. Ez dakit eskolan aurretik jolas honetan aritu ote diren, ezta materiala ote duten ere. Hortaz, erabaki dut 5 x 5 eta 8 x 8ko txantiloiak prestatzea, bihar kopiak egin eta erditik mozteko. Hemen pdfa:
5 x 5ekoarekin hastea proposatuko diot tutoreari, ea nola moldatzen garen!
iruzkinik ez:
Argitaratu iruzkina